Ze specjalną dedykacją dla Natalii:))

22:08

Dzisiaj tekst po śląsku, który wymyśliliśmy wspólnie siostrze na konkurs "Młode fafloki". 
Jako,że temat sportu to bardzo nam to pasowało. Zostawiam Was z tekstem:))

Godajom że szport to zdrowie. A to już zależy do kogo. Bo na pewno niy do mojej matki co to się wiecznie nad tym całym szportym nerwuje. Bo najgorzej jak cało familijo mo na tym punkcie takiego ptoka że szkoda godać. Bo u nos ni ma inszego tymatu ino fusbal, fusbal i jeszcze roz fusbal. I ino moja matka godo że te granie we fusbal to istno gupata i tyn cołki szport je psinco wert.
Wszystko skiż tego że kiery to widział żeby na boisku  było tyla chopa i ino jedyn bal. Za kożdym razym korze mi rachować : dwoch tormanów, 20 fusbalerów i ino jedyn bal?. To wiela to się cza nalotać żeby do budy trefić. Tak se myśla że lepszy by było coby kożdy chop na boisku mioł bal,  toby co chwila na takim meczu kieryś szczyloł buda. A i nojważniyjsze, że wtedy kibice by musiały być bardzij inteligyntne, musieliby umieć lepij rachować. Bo tych budów by sie naszczylało w cołkim meczu mono i ze sto abo dwiesta i te gupieloki kibice nie mieli by czasu wadzić się na meczach, ryczeć na syndziego bo musieli by fest a fest rachować coby się nie pomylić. Zaro by się kultura na stadionach poprawiła i żodnyj haje ani chacharstwa by niy było. Tak samo tyż rachowanie by się przydało łorganizatorom tych meczów, nie cza by było tyla piniyndzy wydować na wachowanie porządku.
Ale to takie babskie godanie. Niech się tam matka pogodo. Pogodo, pogodo i przestanie a łachy i tak nom wypiere. Przeca widziały gały co brały. A my boroki co momy zrobić jak już w gynach momy cołki tyn szport zapisany.
A z tymi gynami to sami wiycie że ponoć niedaleko pado jabko od jabłoni.  To u nos ni ma sie co dziwować.
Dyć mój starzik Józek był fusbalowym syndziom. Roz się zdarzyło że jako kibic boł na meczu II ligi, na kiery nie dojechali syndzie i starzikowi cufalym udało się tyn mecz syndziować a kiedy nie uznoł budy to ciynżko mu było wylyź z boiska.
Wszystkie braciki mojego fatra tyż kopali bal, nojlepszy był ujek Krysiek na kierego godali mesing a to skuli jego rudych kudeł. Szczyloł piykne budy głową i w jednym sezonie zostoł królym szczelców.
Moj łojciec tyż łod bajtla aż do dzisioj loto za balym i jest tyż trynerym. Terozki ze swoimi chłopcami gro w A klasie. Szkoda  że za takie bakanie nie dorobi się na tym boisku pyndzyje.
Ni dziwota wiync że tego bakcyla łykła tyż moja siostra i jo. Łona jest prezesym naszego klubu o jo kopia w drużynie trampkarzy.
Moj bracik poszoł w ślady starzika, erbnął po nim interesa do syndziowanio. Łokropnie przaje tyj robocie. Cołki czas ino czyto i czyto te przepisy i wadzi się z łojcem czy boł faul abo elwer czy niy. Blank dobrze mu te syndziowanie idzie.
I powiedzcie sami czy ta moja matula ni mo przechlapane?


Lepij się to godo niż pisze, ale myśla, że docie rada:))

You Might Also Like

8 komentarze

  1. Aaaaaaaaaaaaaaaaaaa !

    Kochom :-*

    N.

    OdpowiedzUsuń
  2. Na pewno się trudno pisało !! Podziwiam ;)

    OdpowiedzUsuń
  3. Dotarłam do końca i zrozumiałam! ;)
    haah ^^ ale pisanie na pewno nie było łatwe! ;)

    OdpowiedzUsuń
    Odpowiedzi
    1. A no nie było, bo Tyś coroz więcej umiesz po śląsku;dd

      Usuń
  4. Super Madzia!!
    echt gut!! sehr gut!!!

    OdpowiedzUsuń

Subscribe